政情：林家亨話搶鹽係防腹瀉

    • 近日環球金融市場腳震震，散戶唔知入唔入市好，一向風趣幽默嘅恒豐證券研究部董事Simon林家亨就話：「壞消息係珍貴資源，你要利用佢，而唔係畀佢利用。總之，依家就係買貨好時機喇。」

    尋日爆發搶鹽潮，Simon send咗個搞鬼短訊畀記者，叫記者快啲買鹽喎！記者梗係唔會信食鹽可以防輻射啦，於是打番個電話問佢有冇儲備？點知佢話：「死啦！我都買唔到貨呀，依家都唔知點算？如果冇鹽買，咁就買豉油啦，如果連豉油都冇，咁就要去買老抽喇！」

    一聽都知佢係講笑啦，佢澄清話：「我中學嘅物理科同埋地理科成績好好，根本唔相信日本嘅輻射會傳嚟香港。我懷疑有人啲普通話講得唔好，將食鹽可以『防腹瀉』講成『防輻射』，搞到依家人心惶惶。」

    Money18 新功能「18好路數」為你預測心水股票升跌機會率

    林家亨send短訊叫記者快啲買鹽，當然係開玩笑啦。