政情：女童軍高層歡送邊太
香港女童軍總會總監邊陳之娟被揭超齡參選後，任期仲有個幾月，班女童軍高層早幾日就喺金鐘港麗酒店搞咗個午餐聚會，聯誼兼歡送邊太。據聞聚會係由副會長梁王培芬統籌，唔少副會長同名譽副會長都有出席，不過，當選無耐嘅候任總監彭徐美雲就因為身體不適而缺席，不禁令人聯想早排嘅人事紛爭。
身兼副會長嘅大新銀行主席王守業夫人王嚴君琴同積金局行政總監陳唐芷菁都有出席，就連前副會長、教育局局長孫明揚太太孫鍾小芬都有嚟湊熱鬧。
梁王培芳（左）同孫鍾小芬（中）兩位新舊副會長齊齊歡送邊陳之娟（右）。
同樣係女童軍副會長嘅王守業夫人着靚靚出席歡送聚會。