政情：四太心情靚只講賽馬
賭王何鴻燊家族爭產風波平息，四太梁安琪喺澳博嘅地位穩如泰山，尋日更以靚靚心情現身沙田馬場，為出戰第八場港澳盃嘅澳門馬匹打氣。佢一到，大家梗係追問財產分配件事啦，佢先話要專心睇馬，跟住卻話：「依家最緊要係澳門（馬匹）贏！」
賽後再問，佢就好大方咁話：「冇咩特別，大家睇到個結局，同一個和諧家庭分配，最緊要今後做好公司工作。」問四太對個結局滿唔滿意，佢一路話「答咗喇」，但係忽然又爆句︰「唔滿意……跑第三，麻麻哋啦，當然最好跑第一，希望下次澳門贏番。」原來佢講緊澳門馬匹「鴻運駿駒」喺港澳盃賽事中只跑第三名，佢上車前又話：「今日只講港澳盃，其他唔講，唔好搞亂思維。」然後滿臉笑容登車離去。
四太梁安琪現身沙田馬場，馬會主席施文信好友善咁同佢握手問好。