政情：搞搞政：冇順風車搭克勤仔勢危

立法會新一屆選舉將成近年最激烈嘅一次較勁，席位增多引發派系之爭更激烈，新界東選區近期就傳出一個消息，話一直支持開建仔嘅公民力量亦有意打正旗號獨立組隊參選，仲講到明唔計輸贏添。公民力量出張名單，最受影響嘅係建仔喺呢區參選名單中嘅第二位陳克勤，事關佢原本搭開建仔副主席兼名單首位劉江華嘅順風車，家吓架車死咗火，佢如果唔「Try my best」去搵新動力，想再駛入立法會都幾難！

公民力量喺九三年由劉江華創立，扎根沙田區足足十八年，依家喺沙田區議會佔有十五席，地區實力雄厚，情況同民協喺深水埗相似，不過佢哋每次立法會選舉都為她人作嫁衣裳，今次想搵人出選都好正常。地區消息話，公民力量一批核心成員近排不時坐埋密斟，內部評估係即使選輸都冇大問題，因為至少已經做到增加知名度呢一點。

不過，區內建制派有唔少強勁對手，傳會落場玩嘅就有富貴黨田北俊同新論壇龐愛蘭等，若公民力量又爭飯食，建制派有冇咁多票？可唔可以均勻配票？克勤仔唔驚就假喇！