政情：遇狙擊露晒底邱騰華廢到爆

本港面對愈嚟愈沉重嘅垃圾處理壓力，政府早前拋出喺離島興建焚化爐嘅構思，只係建議曝光後，環境局一直冇乜大動作。局長邱騰華尋日出席一個電台節目時，就畀一個長洲嘅80後狙擊，攞住政府嘅環評報告嚟挑戰，喺環保政策上屢戰屢敗、次次烏龍嘅邱騰華明顯理論水平唔夠，冇正面回應人哋嘅高質素提問，淨係唔知擦鞋定暗諷咁話，歡迎呢啲理性同講道理嘅溝通喎，答案夠晒廢！

暗寸80後唔講道理

選址興建焚化爐係大事，但政府到家吓都未詳細解釋，或者係咁，邱騰華尋日出席電台節目《政壇新秀訓練班》時，原本想硬銷政府嘅垃圾環保政策，但啲後生仔卻轉移咗關注目標，其中一名居住長洲嘅80後政壇新秀更搶佔議題，連珠炮發咁發言十幾分鐘，力數喺石鼓洲起焚化爐嘅種種壞處，又批評政府份環評報告雖然對重金屬有規定，但就對重金屬嘅累積隻字不提。

該名80後仲引芬蘭焚化爐附近居民嘅頭髮水銀含量超晒標為例，質問邱騰華點解決？佢準備充足，提問有數據、有例子，邱騰華一路聽一路有反應，直到人哋要佢解決時，佢先好似打哈哈咁，大讚對方理性、講道理，可惜回應既冇政府立場同反擊呢個提問者嘅論據，又冇政府對於興建焚化爐後周邊居民生活環境嘅評估資料。

最叻嘅，就係借讚人理性，藉此暗寸激進80後唔講道理。問責局長有成個政府資源做後盾，講道理都輸畀年輕人，難怪呢個局長之前推慳電膽、堆填區等失敗收場，咁嘅問責官員係咪太廢呢？