政情：助選區會被飛起 鄉事派撼龐愛蘭

年底就係區議會換屆選舉，仲係攞二○一二年立法會「超級區議會」入場券嘅唯一渠道，各政團早就部署搶位。早前有消息指出，新論壇兼立法會廠商界代表林大輝做搞手嘅Ｃ１８成員，沙田火炭區議員龐愛蘭，都覬覦超級區議會嘅席位，但近日有地區消息傳出，佢競逐連任區議會席位有暗湧，入場券可能不保。

喺○七年區議會選舉，龐愛蘭喺鄉事派同建制派嘅支持下，擊敗泛民主派當區區議員蔡耀昌而突然冒起，旋即被其他建制派政黨招手，富貴黨同由該黨分裂出去另起爐灶嘅經濟動力，都曾經招攬龐愛蘭，但最後食晒檸檬。

臨近區議會換屆選舉，有地區消息人士透露，當年龐愛蘭喺鄉事派力撐下當選，但選舉後好似過海神仙咁，對鄉事派多謝一句都冇，亦甚少落鄉，而惹起不滿，唔少鄉紳更認為當年抬得佢上去，亦可以拉番佢落嚟，盛傳鄉事派正醞釀派人參選區議會硬撼佢。

着眼全港 疏於地區

除咗鄉事派外，建制派亦對龐愛蘭有好大意見。嚟自建制派政團嘅消息話，火炭區以中產居多，就算佢集中火力爭取支持嘅兩個高中產屋苑，反應都唔見得好，再加上佢近期放眼於超級區議會議席，做事多為爭取全港曝光率，疏於地區工作，連建制派都唔多滿意，想繼續撐佢都好難，亦對佢年底能否成功連任不表樂觀。

空穴來風未必無因，尤其政治圈冇永遠嘅朋友，亦冇免費午餐，區議會選舉被視為立法會選舉擴大政治版圖嘅前哨戰，喺僧多粥少下，建制派未必會再放水畀其他人。

喺建制派唔撐、鄉事派又反枱，仲有泛民可能捲土重來下，政治形勢都相當惡劣，睇嚟龐愛蘭都幾頭痕，要力保不失就快啲度絕橋喇！