政情：立會議員北上被拖後腳
立法會過去三日合共進行三十粒鐘辯論，但仍未就立法會選舉辦法嘅草案進行三讀。由尋日開始，審議進度以龜速進行，冇人估到要開到幾時先完晒全部議程，搞到唔少議員行程大亂。
好似一班建制派議員都畀長命會搞到好頭痕，身兼全國人大代表嘅工聯會黃國健同經濟動力嘅全國政協林健鋒諗住飛上北京開會，望住張一改再改嘅機票，兩個人都極無奈。
白鴿黨尋晚本來舉行一年一度嘅春茗，但八個議員同部分政黨嘉賓都要罰留堂喺立法會等投票，春茗變得冷冷清清，好彩仲有副主席單仲偕充撐場面。
另外，泛民多個黨派聽日下晝聯手發起反預算案遊行，到時分身都唔掂。張文光話今日睇情況再決定是否要求立法會主席押後到禮拜一先復會，以便遊行可以順利進行，仲可睇埋聽晚曼聯對利物浦嘅英超大戰。
