政情：克勤遊京難忘變形金剛
我哋早前同大家講過，立法會議員陳克勤帶團上北京，撞啱零下十幾度低溫，凍到騰騰震。克勤仔返嚟後，講到北京行，最難忘嘅卻係參觀七九八藝術區，仲畀佢見到一件仿製「變形金剛」領袖柯柏文嘅巨型機械人。
呢個機械人足足有四層樓咁高，好似真嘅一樣。克勤仔話，雖然佢唔係好認識變形金剛，但平時好鍾意砌模型，遇到咁巨大嘅機械人都好興奮，忍唔住同機械人影番張合照。佢大讚藝術區地方夠晒大，展品又多，相比之下，香港嚟嚟去去只有土瓜灣牛棚藝術村、火炭藝術區同石硤尾創意藝術中心，藝術發揮空間好有限。
講完藝術經，克勤仔講食經，透露佢專程去胡同小巷，幫襯享譽北京嘅利群烤鴨，佢話啲烤鴨係用古法炮製，肉質帶有木香，好有風味，而且價錢唔貴，值得一試！
