政情：金勞詹賭贏千萬靠術數

    • 每逢過時過節，有立法會「賭神」外號嘅金融服務界代表「金勞詹」詹培忠，都愛到外地賭場玩番兩手。

    據金勞詹友人講，喺啱啱結束嘅聖誕連新年假期，金勞詹同共約五十名戰友，包咗兩架機去咗攻打新加坡兩家新賭場，大戰三日，大部分人都有斬獲，而金勞詹手風特別順，贏咗一百八十萬元坡幣，即大約一千萬港元，呢趟收爐之作為佢喺一○年戰績畫上圓滿句號。

    其實，佢喺過去一年已經賭少好多，事關有相士提過佢，二○一○年不利佢嘅賭運。佢今次獅城之行，有同行「戰友」問金勞詹，年尾都贏錢，係咪做過法事抗逆運？金勞詹話從術數角度，年尾幾日要計入新一年嘅運數中，而佢為一○年埋單計數，的確輸多過贏，所以，術數正確。咦，咁金勞詹喺一一年咪會行大運！