政情：沈祖堯定期入川做義工
中文大學校長沈祖堯話無論幾忙都好，一年都會抽幾日去做義工幫四川地震災民。
沈校長尋日下晝出席一個義工活動時，話自己未做校長之前，○八年開始每半年去一次四川地震災區做義工。佢話唔少義工經歷都好難忘，最記得有次四川好凍，佢拎啲衫畀當地嘅老人家，老人家一見到啲衫就喊到收唔到聲，原來老人家話雖然成日傳言話有物資，但一次都冇到過手，直至見到佢送嘅衫先第一次受助，搞到佢覺得幫到人自己都好感動。
沈校長話災後啲後生仔去外地搵食，留低啲老弱婦孺，佢會教啲小朋友英文，又幫長者義診。佢仲計劃再去四川或者烏干達幫愛滋病人，希望以身作則鼓勵中大學生做多啲義工。佢呼籲啲義工唔好以為幫人係施捨，其實自己都受惠唔少，要融入當地真心幫人。
