政情：曾智雄牛一屋企開P
全國青聯前副主席兼金利來太子爺曾智雄，前晚喺九龍塘豪宅筵開十圍慶祝生日。佢自嘲「老餅」，本來唔諗住高調吹蠟燭，全因曾老太一句：「屋企呢排冇乜人氣，咁啱你生日，不如搞party。」
奉旨開P，大哥智謀一家同細佬智明一家到場幫手打點，智雄仲抱住五個月大B女，同產後極速瘦身嘅太太滿場飛招呼賓客。曾老太比佢更high，仲催促壽星仔上台唱K搞氣氛；爸爸曾憲梓因行動不便，坐埋一邊感受歡樂氣氛。生日願望係乜？壽星仔話最緊要開心，但佢唔肯透露幾多歲，笑言年年「廿五」。
壽星仔曾智雄（左）帶埋B女、太太（中）齊開P，愛熱鬧嘅曾老太（右）成晚都好開心。
本來臥床休息嘅曾憲梓（前排右）見到成班後生仔，即時起身招呼客人，開心到笑唔停。