政情：搞搞政：任總揸重人仔好和味
任志剛喺舊年十月卸任金管局總裁後，一直退而不休，活躍於香港同內地嘅經濟金融界，依家除咗係中國金融學會執行副會長之外，亦係中大全球經濟及金融研究所嘅傑出研究員，可以話係百足咁多爪。
尋日喺中環撞到任總，問起點睇人民幣（人仔）嘅升值潛力，佢點都唔肯捽個水晶球作預測，但就話一早儲落唔少人仔。以依家嘅一兌一點一幾嘅匯價計算，佢都笑笑口咁話回報「幾好㗎」！
一個成功嘅投資者最緊要就係早着先機，好似任總咁，一向對香港嘅人民幣業務素有研究，退休前更加代表香港同內地銀行簽訂合作條款，落實畀香港以人仔進行貿易結算。好明顯，佢投資之所以能夠獲利絕對唔係靠好彩，而係靠研究同做足功課，各位投資者真係要好好學習喇！
