呢幾日大家都知道鬍鬚曾康復進度良好，鬼打都冇咁精神，但煲呔曾尋日下晝四點五十二分去到醫院，喺病房逗留咗大概十五分鐘後，離開嘅時候面如死灰，仲好似想喊咁款，又用左手掩住心口，口窒窒咁話：「好彩冇嘢喇，心頭大石放得低，見佢好似平時一樣，神色好，有講有笑，希望佢快快趣趣復原啦，好番晒先至返工啦！」點解煲呔曾把口講好消息，但臉容就咁憂傷呢？唔通有啲嘢唔講得出嚟？

鬍鬚曾嘅主診醫生李偉聯忽然變成大紅人，尋日朝巡完病房等期間，又畀大批記者包圍，仲畀記者追到入。被問到鬍鬚曾可唔可以回家過中秋，佢竟然反問：「幾時係中秋節呀？」當佢知道今日就係中秋節後，就回答話：「有機會！總之佢復原得相當好同快，如果司長依家行出來，會同你哋一樣，你唔知佢病緊，行得走得，仲自己沖涼，乜嘢都做到！」不過，鬍鬚曾尋日朝進行抽血檢驗，目前仍要等候驗血報告，至可決定出院時間。

醫管局主席胡定旭一落機都有去探鬍鬚曾。肥胡走後，東亞銀行主席李國寶亦去探望鬍鬚曾，見佢手持一個紙袋，露出一個楊桃燈籠，逗留十分鐘就離開。問李國寶係咪送贈中秋賀禮畀鬍鬚曾應節，佢就話只係生果同日用品，之後匆匆離開。