全國政協常委陳永棋形容香港架花車好醜樣，唔得大體，睇唔到有擺放特別心思，同內地省市花車比較，香港品質排到好後，十年前曳，十年後又係咁曳，即係十年冇進步過。究竟點醜樣法呢？棋哥話總之係唔順眼啦！

觀禮團成員黃容根話香港架花車比起內地省市嘅花車相形見絀，花車主題反映高官冇遠見，只係將啲舊嘢堆砌喺花車上。另一成員黃定光都話架花車單調，好淡色，車上嘅國金模型似鬚刨。

香港架花車由政制及內地事務局統籌，用咗三百三十萬元公帑製作，外判畀本港公司設計。據講旅發局新年識郁嘅牛形公仔巡遊花車只係用咗五十萬，點解呢架花車要成三百幾萬呢？政府只係死撐話靚唔靚只係各花入各眼，要尊重唔同人嘅品味喎。