消息話，前晚至少有三名全國政協常委缺席晚會，包括唐唐嘅好友許仕仁，所以有傳佢哋一齊外出撐枱腳。不過，唐唐嘅新聞秘書就話唐唐成晚喺酒店，冇出過去。

唐唐尋日步出機場閘口，只見佢滿面通紅，但對有關睇閱兵儀式曬到不適嘅問題，一律封口唔答。

喺烈日當空下睇閱兵，變相乾曬幾粒鐘，個個曬到紅卜卜，例如運輸及房屋局局長鄭汝樺、匯賢智庫葉劉淑儀同經濟動力「蘇菲」梁劉柔芬都做足防曬措施，當中以蘇菲最勁，除搽防曬膏同戴專業防曬帽，仲要搵港區全國人大馬豪輝遮陰，事關馬豪輝夠大份，蘇菲匿喺佢後面，連手腳都遮埋，防曬一絕！