無微不至車廂小法寶

係人都知安全帶幾咁重要，不過無論日本車或者歐洲車、高價車定係入門車，原廠所用嘅安全帶由款式到質料都差唔多，老實講都幾悶，肯花心思嘅車主，除咗添置香精、加塊太陽擋之餘，不妨都為安全帶搞搞新意思。坊間就有唔少安全帶附加產品選擇，既可增加舒適度，價錢又唔貴，不妨入手。

安全帶類別

減壓軟墊 $120

急煞時安全帶自然會拉緊，難免對乘客造成不適，不過用咗呢款momo軟墊，就可減輕對肩胛位造成過大壓力。

防滑安全帶墊 $88

採用網面設計，而且彈性相當高，套上之後又有防滑效果，舒適之餘又體貼，日本出品果然細心。

兒童座椅安全帶夾 $188

呢款產品可將安全帶調校到合適長度，避免安全帶過長對小朋友構成纏頸風險，家長自然安心晒。

特長安全帶套 $58

以上安全帶套都屬於短身款式，呢款產品就由肩胛位去到腹部，令整個上肢都可避免因受壓過多而引起痛楚。

增值類別

罅隙軟墊 $88

每當清潔座椅，好多時都會發現罅隙藏有錢幣、紙巾等雜物，用咗呢款軟墊「攝灶罅」，就唔使再執餐懵啦！

車廂衣架 $190

對OL或西裝一族嚟講，坐長途車唔只怕攰，仲怕整皺西裝褸，其實加個車用衣架將西裝掛起，問題就可迎刃而解。

車用雨遮套 $88

呢期大家一定遇過落雨上車之後，雨遮水滴整濕車廂嘅苦惱，呢款專為後座而設嘅車用雨遮袋，正好大派用場。

Hello Kitty座椅頭套 $480

唔少原廠頭枕都有偏硬嘅問題，加裝頭套就搞掂晒，若然你童心未泯，或者女友係卡通迷，可會考慮呢款「吉蒂貓」產品？

額外雜物箱 $95

車廂儲物箱唔夠用？大可加裝呢款小型儲物箱，紙巾、CD以及銀包等細細件嘅物件都放得落，車廂當堂企理晒。

查詢：2392 4244（台日汽車精品）