零技巧意式冷鮑魚沙律

平日整鮑魚，又浸又發又要炆，心機時間唔少得，或會嚇窒入廚新手。參茸海味老字號「恒興行」第2代傳人Macy，以行動證明罐頭鮑魚都可以煮出千萬變化菜式，正如今次示範的鮑魚水牛芝士番茄沙律，簡簡單單超易整，都可以食得矜貴過人。

Macy雖然愛入廚，亦煮過無數海味，都笑言煮海味有難度：「好似炆鮑魚咁，工序繁複，由準備到炆煮起碼3日時間；而且海味比較貴，煮得唔好就好浪費。」所以，Macy提議大家可以用罐頭鮑魚入饌，簡單方便，而且煮法多多，像她炮製過的鮑魚雞粒蒸飯，又或將鮑魚粒、鹿柳粒、粟米粒及沙葛粒等做家常小炒。

鮑魚粒　愈食愈鮮甜

Macy表示罐頭鮑普遍一開即食，又或是原罐煲腍煮餸，但像她入口的新西蘭翡翠鮑魚，卻最啱凍食，她說：「這種鮑魚纖維密度高，熱食的話會好韌，成罐雪凍開嚟食就最好，切成大粒或厚片，具質感又Juicy，仲愈食愈有鮑魚鮮味添！」這次她示範的沙律，就用鮑魚粒，配搭意大利水牛芝士、番茄等，全都是她至愛，還特別推介用日本沖繩海鹽作調味，有助提鮮，加進沙律中簡直是Magic Touch。

做法：（4人份）

1　將鮑魚原罐放入雪櫃最少3小時，切大粒，鮑魚汁可留用。

2　將車厘茄及生菜洗淨。車厘茄切半，生菜切去較老的菜葉，水牛芝士切厚片。

3　先將生菜墊底，加入海鹽、橄欖油調味，拌勻後加入車厘茄、水牛芝士、鮑魚粒，再澆點橄欖油、黑醋即成。

所需時間：約15-20分鐘

Check List

材料：

新西蘭翡翠鮑魚 1罐

羅馬生菜 1包

車厘茄 10粒

水牛芝士 100克

橄欖油、意大利黑醋、海鹽 適量

溫馨提示：

1. 翡翠鮑魚需冷藏3小時或以上，可帶出鮑魚的鮮味。

2. 留起的鮑魚汁，可用來煮麵和做湯底。

話你知

1.翡翠鮑魚

鮑魚種類多，像這來自新西蘭的品種，因食海藻而令鮑魚及鮑魚汁呈綠色，沒經漂染，鮑魚味濃郁鮮甜。可即開即食，切粒及厚片最能凸顯其質感，做沙律或淨食皆宜，蘸點日式的芥末豉油就最滋味。

2.水牛芝士

這以水牛奶製成的芝士，味道較淡，質感軟綿滑溜，常用於意大利菜的頭盤、沙律及薄餅等，一般用鹽水浸着，可存放幾天至一星期不等。選購時，可揀印有法定產區命名「DOC」封印的，質素最好。

Macy's Profile

廖淑雯是逾半百年歷史參茸海味店「恒興行」的第2代傳人。暱稱「家嫂」的她愛煮愛食，對參茸海味非常熟悉，更自煮新派菜，像鮑魚可做烏冬、沙律，海參也能炒意粉，還有鹿尾羓泡花果茶，鹿筋做涼拌等，融會中西，變出新意，著作有《家嫂廚房》。