矜貴燕窩釀雞翼
引頸而待的富哥飯局，終於開飯，最恨食到這富豪御廚的招牌菜「燕窩釀鳳翼」。雞翼平凡，但他卻能點石成金，新鮮雞翼褪骨，釀入用上湯煨過的燕窩，再香炸。雞翼皮脆肉嫩，仲有啖啖軟綿燕窩，熱辣好味又養顏，見大家低頭密密食，聲都唔出，就知唔係講笑。
街坊立食車仔麵
家在灣仔，卻少有在區內開飯，一直得舊同學、朋友激讚的晏頓街車仔麵，也是在幾年前才識貨幫襯。麵檔細細，但算企理乾淨，無位坐仲要企喺度食，成為一大特色。個人推介脆卜卜蠔油齋、清甜無渣蘿蔔及柔軟入味的冬菇，連埋店子秘製辣醬，搞到成日好想去食。
牛腩名店肉碎粥
銅鑼灣的漢記牛腩出名正，其「崩沙腩」年前就被美國CNN旗下網站CNNGo選為最佳廉價美食，但這裏亦有其他好介紹，像方魚肉碎粥，偶然試過即迷上。名為粥其實係泡飯，內有方魚碎、肉丸、生菜、葱及飯粒等，簡簡單單，但食落有不同口感，而且暖胃飽肚，曾是很多晚開OT後的「心靈雞湯」。
