一對一串流 遙距錄高清

小記身邊有好多電視精，莫講話喺屋企要日煲夜煲，就連出街都要用電視手機追劇。只不過電視手機通常用料一般，接收能力亦不太穩定，行步路都會跳線，睇到人發忟憎！由幻音數碼推出嘅Vulkano就冇呢個問題，只要接駁機頂盒，就可把1,080i數碼電視節目，經3G串流至手機上欣賞，用戶還可進行遙距錄影，隨時回味！

串流廣播（Streaming Broadcasting）技術已面世多年，簡單來說就是將家中的電視訊號，經由互聯網轉播到手機上，讓用戶隨時收看直播節目。惟受頻寬所限，以往串流廣播質素只是一般，直至近年3G速度屢創新高，串流畫質才得以提高，市場上亦衍生出Vulkano這類高清轉播盒。

高清追劇隨街睇波

高清當道，Vulkano賣點之一，在於提供一般AV線輸入之餘，還設有720p或1,080i的色差輸入端子，用戶只要經它們接駁高清機頂盒，就能將電視訊號經寬頻或Wi-Fi駁上互聯網，出街時就可以使用手機串流播放。官方指Vulkano支援市場上大部分機頂盒，並兼容now TV及有線電視的解碼器，因此既睇到J2，亦可以在街上睇足球直播。不過，為提高串流速度，輸出解像度最高只有720×480，實測下發覺用手機睇剛剛好，影像細緻，沒有出現「狗牙」，惟用iPad或Notebook睇時就有點鬆散。另外要留意Vulkano雖然可駁到iDTV，但後者就必須長開，頗為嘥電。

兼容主流手機平台

Vulkano支援多個手機平台，包括Android、BlackBerry及iOS等，用作播放的《Vulkano Player》更是完全免費，不像其他轉播盒應用程式般需要另外收費。操作方面，《Vulkano Player》跟一般電視遙控器分別不大，均可選擇訊源及轉台，最特別是提供預錄功能，只要輸入頻道、錄影時間及畫面質素等資料，就可把指令發送到Vulkano進行錄影；屆時節目就會儲存在SD卡或外置硬碟內，之後透過手機便能隨時重溫。跟其他轉播盒一樣，Vulkano僅能註冊一個用戶帳號，即係話用咗iPhone睇，就唔可以同時再用iPad睇，只能做到一對一串流。

SPEC

解　像　度︰1,080i

串　流　解　像　度︰720×480

支　援　視　頻︰數碼電視、now TV、有線電視

擴　充　介　面︰SD/MMC、USB、eSATA-II

端 子︰YPbPr、Composite、HDMI

對應手機系統︰Android、BlackBerry、iOS

尺 寸︰219×161×39mm

重 量︰635g

查 詢︰2295 6898

堅高清廣播 Slingbox PRO-HD

除了Vulkano，另一轉播盒Slingbox PRO-HD亦於同期推出。Slingbox早年已經在港出過PRO版，並支援1,080i輸入，但當時輸出只有640×480，畫質一般。今次加推的HD版，顧名思義就是加入硬件解碼功能，可實時輸出1,080i影像，莫說手機，即使用屏幕大幾倍嘅iPad或Notebook睇依然靚爆鏡。平台方面，它支援iOS、Android及BlackBerry，但用於播放的《SlingPlayer Mobile》就要另加US$29.99購買，都幾貴！若唔想畀錢亦可透過電腦瀏覽器觀看，毋須安裝程式，慳番一筆！

查詢︰2485 6321