Logitech喇叭打機似落場

小記一向不太看重電腦喇叭，無論其規格幾勁，都先入為主地覺得音色比不上影音喇叭。然而接觸過Logitech Surrond Sound Speaker Z906後，先發覺原來在500W輸出及Dolby Digital技術支援下，電腦喇叭可以靚聲成咁；若駁埋PS3打《Winning》，更係人聲鼎沸，勁有臨場感，最啱放喺客廳招呼朋友！

房仔唔啱玩

提起Logitech，大部分人會諗起Keyboard同Mouse，但其實佢哋出喇叭都有一段歷史，只是售價過$3,000的頂級型號，數來數去只有Z5500一款。時隔6年，廠商終於推出後繼型號Z906，跟Z5500一樣，它都是定位為5.1聲道喇叭系統，配備了一對前置、一對後置、一組中置及一組重低音音箱，用戶可自由堆疊，或按家居間格懸掛在牆上，打造最佳「皇帝位」。惟留意整套系統都頗為巨型，100呎房仔未必啱玩，建議放在客廳使用，然後透過紅外線遙控器控制音量及播放效果。

500W強勁輸出

電腦喇叭受體積所限，輸出功率不會太高，直接影響了低音表現。Logitech Z906叫人另眼相看，單係重低音輸出就有成165W，配合5組67W衞星喇叭，總輸出就達到500W，就算在千尺大廳都能聽出細膩層次感。為了加強Bass位，重低音音箱更採用了強力氣壓、側反射式技術，令失真程度減至最低，炸機一流！其他技術方面，它支援THX認證、Dolby Digital及DTS解碼，另外還對應2D轉3D功能，任何兩聲道音源都可變成3D立體聲環繞音效，真係煲劇都有劇院級音色。

打機如置身現場

近年愈來愈多用戶將遊戲機、電視跟電腦接駁到同一組喇叭，藉此節省居室空間。Logitech Z906亦照顧到這方面需要，它設有數位光纖、數位同軸、RCA音訊及3.5mm等輸入介面，最多可同時連接6個音源，用戶可一次過駁晒電視、Xbox 360、PS3、Blu-ray機、電腦甚至iPod，一口氣滿足影音迷及機迷需要。以《Winning Eleven 2011》進行實測，無論人群裏的吶喊聲，抑或球員射門聲，都能聽得一清二楚，打機猶如置身現場，自然玩得更投入！