《Michael Jackson The Experience》 學足MJ跳Moonwalk

雖然落場無耐嘅N3DS都幾有Noise，但相對來說，今期家用遊戲就比較靜局，Microsoft就趁機喺日前搞咗個小型遊戲展，Show吓即將在三、四月推出嘅新遊戲。當中最吸引嘅要算係Kinect版《Michael Jackson The Experience》，可以對住電視大展Moonwalk舞步；至於另一隻重量級大作《Homefront》就可揸槍抵抗入侵嘅北韓軍，同樣刺激！

之前喺Kinect方面都出過兩隻跳舞遊戲《Dance Central》同《Dance Evolution》，但點都唔及可以親身大跳MJ勁舞嘅《Michael Jackson The Experience》吸引！雖然呢款攞晒License嘅大作試玩限制比較多，就算喺今次展覽上，都只可以由舞蹈員示範，但一樣睇得過癮。

專人教跳 經典金曲

遊戲入面集齊晒MJ嘅經典歌曲，除咗今次示範嘅《Bille Jean》外，仲有《Bad》、《Black or White》、《Beat It》等等，要幾經典有幾經典，仲可以用埋之前喺《LIPS》附送嘅咪高峰唱埋MJ金曲添！當然大家唔好期望一玩就可以跳到好似MJ咁有美感，所以遊戲入面仲加入埋Michael Jackson跳舞學校模式，由排舞老師以Video形式逐個舞步教大家跳，仲可透過遊戲內嘅MV重溫呢位樂壇巨星嘅風采，又唱又跳，有得學又有得睇，Fans們點都要買隻返屋企看門口！

Kinect遊戲

類　　型：音樂、跳舞

開　　發：Ubisoft

推出日期：4月14日

售　　價：待定

《Homefront》美國淪陷

二次大戰甚至越戰背景用到爛，今次《Homefront》高招在拖埋北韓落水，講述2027年北韓發圍打到去美國，身為美國人嘅玩家要喺自己地頭抵抗北韓軍隊，小記建議大家花時間睇晒段片頭動畫，皆因「希拉妮」同「金正銀」都會出場，感覺埋身好多。

單人模式內，玩家要同其他自由戰士喺美國本土打游擊戰抵禦北韓部隊，但當見到街頭滿目瘡痍，大批美國人變成階下囚兼要送去勞改，感覺跟一般大美國主義嘅遊戲好唔同，亦係《Homefront》最有趣嘅地方。遊戲用上近代背景，使用嘅武器都幾現代化，但要留意玩家無全身盔甲，中幾槍就會死。

至於多人模式方面，就會將背景設定喺美國淪陷初期，殘餘美軍要同北韓軍大戰，配合埋武裝直升機同坦克陸空聯合作戰。Xbox 360版仲會收錄獨家嘅Suburb多人遊戲地圖，版圖內設有大量空置的房屋及建築物供埋伏同狙擊之用。

類　　型：射擊

開　　發：Kaos Studios

推出日期：3月15日

售　　價：$349

同期新作:養另類動物《Fantastic Pets》

遊戲設定有啲似之前MS自己隻寵物遊戲《Kinectimals》，而且所養嘅寵物都好另類，好似噴火狗、飛馬同長毛蜥蜴等，玩法離不開同寵物玩、影吓相同教佢做唔同嘅動作！

Kinect遊戲

類　　型：寵物養成

開　　發：Blitz Games Studios

推出日期：4月12日

售　　價：待定

泰臣打阿里《Fight Night Champion》

今集《Fight Night Champion》做得超像真，更改良了揮拳系統，令操作更容易；另外遊戲亦收錄眾多經典拳王，如泰臣、阿里、荷里菲特等統統都有得揀！

類　　型：拳擊

開　　發：EA Canada

推出日期：已推出

售　　價：$329

查詢：3071 4868