黃雪文×黃詠詩　獨步劇壇

在藝術行業生存，從來都不是容易的事。作為劇壇的獨立分子，付出和收入很難成正比；劇場謝幕的時候經常聽到演員們呼籲：「聽日同後日仲有飛，如果覺得好睇就叫朋友嚟睇啦！」或者「出面有少少紀念品，支持下啦！」就知道他們搵食艱難。身兼編劇和演員的兩位劇場獨立女生：黃雪文和黃詠詩，真情演繹她倆的劇壇心聲。

詩：黃詠詩　雪：黃雪文　Q：記者

Q1：兩位同為演員兼編劇，是否小時候對文字已經有特別敏銳的觸覺？又或者創作力特強呢？

詩：小學一年級時，寫了一篇參賽作品叫《開心房間》，內容關於一間房，每個人入去之前都要沖洗乾淨和穿上新衣，而房間會噴出一些煙霧，令人笑得好開心，然後他們就全部死掉。之後老師即刻要見家長，哈哈！

雪：細個時不知不覺愛上文字，那個年代好流行抄歌詞，我亦好鍾意做這種無聊事；看小說的時候，亦喜歡Highlight一些喜歡的字句，這對作文亦很有幫助。好鍾意《流金歲月》、《朝花夕拾》同《玫瑰的故事》，成日都好想寫一套《新流金歲月》。

Q2:你們作為獨立劇壇中人，這條路難行嗎？

詩：無任何政府資助、無人會幫手做宣傳，我們只得長期靠自己營運，沒有甚麼千里馬與伯樂，任何事都要靠自己親力親為，連觀眾都要自己搵，其實都幾艱難，所以觀眾同朋友給我們的Feedback很重要，因為他們會欣賞到我的演出之餘，亦會話畀我知，咩係唔啱我做，這種關係十分重要。

雪：可能有些人會覺得我們這幾個女仔又或者獨立小團體好型，可以做自己喜歡的事，其實並不易做，尤其是創作的時候，對於我來說，是很需要一些朋友的支持和鼓勵，正如阿詩所講，大家會互相提點，在不同範疇互相Support。

Q3 :工作和收入都不穩定，你們如何看待這樣的生活？

雪：好感恩個天對我不薄，可以賦予我一個成日「發霉」的狀態，讓我有好多時間可以「執嘢」，如果生活忙碌，根本無時間去思考和創作。試過返工搵錢，結果走入廁所喊，覺得自己好無靈魂，原來生活入面，最驚就是無咗自己的靈魂。我鍾意做創作，站在舞台上，並不是為享受眾人目光，而是享受用自己腦袋想出來的一切，有一班鍾意聽自己講古仔的人。所以我好感恩，讓我有條件可以繼續在這行生存。

詩：我一個人住，要養貓，還要供養父母，其實做這行真的搵食艱難，於是就要自己想辦法，教編劇無人學，就教Creative Writing；有人想學電影，又去教，然後不斷搵資料睇。其實在過程中，自己都學習到好多，行一步，就會有第二啲Reward。可能對於某些人來說，以創作作為職業是很難維持生活，但既有機會做到就去做。我可以好大聲話畀人聽，我做得到，唔係一個空想，而且會好努力繼續做。

後記：誓不低頭……型!

　　小記作為會買飛入場看她們演出的觀眾，其實好感受到她們作為藝術工作者的熱誠。要開一套劇，不是大財團拿一大筆錢開部戲咁簡單，當中涉及的籌備工作，如找場地、寫劇本、管理票務、宣傳等等都要自己一手一腳去做，很不容易。但眼看她們仍然真心堅持自己喜歡做的事，靠自己實力，咬緊牙關不向現實低頭，我真心覺得這兩個女子好型。