Fundman睇市：中廣核電力 新高可期

阿爺大鑼大鼓幫港股通撥火，講到管理萬七億人仔的公募基金，可以繞過QDII配額入市，但睇番除咗消息公布的頭兩日，105億元人民幣額度用盡之外，港股通的熱鬧情況，好快打回原形，尋日南向剩餘額度97.9億元人民幣，用剩93%。

街外唱到行，話五、六月深港通開車的同時，北向南向限額都會齊齊加碼，真係唔識畀佢嚇死，識就笑鬼死果隻。話雖如此，整體大市成交的確又比二、三月多一大截，過去七日平均2,398億元，錢從何來？唔通真係經羅湖的人肉解款員可以帶到咁多人仔過關咩。

水務股全面開車

國務院印發《水污染防治行動計劃》，內容提到二○二○年全國水環境質量改善目標，香港人成日睇住年年加價的東江水污染的新聞，相信身為消費者，都希望水十條真係可以落實改善供水質素。

受政策消息影響，水務股昨日通通開車，中滔環保（01363）升13.1%、北控水務（00371）升10.3%，康達環保（06136）升10.1%，而中國水務（00855）亦升7.7%。

國務院審核「華龍一號」三代核電技術示範機組，核電股又再發威，上海電氣（02727）爆升20.5%，哈爾濱電氣（01133）升17.3%，中核國際（02302）升16.2%，中廣核電力（01816）都升9.2%。老毛病復發，假如睇番近一兩年業績透明度及增長條件，哈氣同上氣都唔係我杯茶，但純睇圖又真係大成交破晒位，實在唔夠膽亂講個頂會去到邊。

對比之下，內地核電經營一哥、坐擁全國過半核電機組的基金股中廣核電力，估計短期走勢至少無上述兩隻咁飄，股價上星期見過5.1元上市新高之後，本周二、三落番嚟搵支持，周三見4.1元後又再掉頭向上，只要破到4.65元阻力，在全無蟹貨及基金吸到乾晒之下，短期應可再創新高。

睇番中廣核電力舊年業績升36%，至57億元人民幣，收購台山核電廠41%權益的利好開始浮現，上市後淨負債大減88%，融資成本減低，是今、明兩年業績增長的動力來源，一五年PE25.7倍，係就係貴少少，但業績較啱睇之餘，份屬半個國家隊成員的CICC最近出報告唱到5.57元，短炒一轉實在未嘗不可。

東網Money18 App搶先機

另外，港股持續暢旺，各位看官如欲掌握投資先機，請即在Android的Play Store或者iOS的App Store下載東網Money18 App，隨時睇到心水股票免費報價、A股報價及AH差價等，同時亦有專家即市推介，助你縱橫股壇。