Fundman睇市：中航科工水漲船高

滬綜指再升1.66%，上星期有167萬新開戶，「股盲」數目亦激增，新股民有六成僅初中學歷，但學歷與投資並無直接關係，尤其現時A股最重要是「勇」字掛帥，所謂有智慧不如順勢，愈多學識可能愈多顧慮，經濟學者買股未必及得上一介平民。

不想做股盲又想賺錢，最佳方法是買股票基金，據統計，截至三月第三周，中國公募基金發行規模首次突破5萬億元人民幣，新基金數目較去年同期激增4倍，基金經理幾時入貨真係考起，因為A股現時盲牛式狂衝，想睇定啲先已隨時被市場拋離，故此明知有泡沫亦要同人鬥傻。自上周五中證監開綠燈之後，公募基金開闢投資港股通一途，就算A股行兩步、港股行一步，獲注入的資金已相當可觀。

險資南下有商榷

除此之外，中國保監會亦話開放險資落來香港買創業板，10萬億資金可南下，睇個標題嚇親，原來是指將險資範圍由香港擴大至45個國家或地區，創業板只是其中一個增加範圍。香港創業板總市值得2,000億元左右，200間加埋唔夠一間漢能（00566）大，要買起易過借火。內地創業板「市夢率」逼近100倍，但險資理應買穩陣資金，現時放寬買創業板及BBB-級債券，在下並不苟同。

股盲亦可抽新股立於不敗之地，但僧多粥少如同抽獎，證監會今日或發新一批IPO批文，市傳今次新股數目將達30家，閒閒哋又話凍資3萬億元，往績顯示大凡新股集資期市況例必回軟，但不少股民及基金經理亦視之為趁低吸納良機。港交所（00388）已放風話今年內想搞埋A股股指期貨，雖然成事機會頗高，惟未推出前，A股ETF是最簡單途徑，昨稍為特別之處是南方A50（02822）成交多過安碩A50（02823）。

盈利維持高增長

買一些上市公司可間接投資A股，所指的是復星國際（00656）和中航科工（02357），因其持有A股附屬；以大價股而論，復星今年的升勢可能僅次於漢能；至於中航科工業績公布後亦見三白武士，集團持有的A股公司包括中直股份（600038.SH）、洪都航空（600316.SH）及中航光電（002179.SZ）等，相關A股上升，其資產值亦水漲船高。

中航科工去年核心純利上升11%，教練機和通用飛機收入分別按年升68%和62%，管理層根據本地訂單付運情況，預期今年增長雖未必再達六成之多，但仍會相當強勁。管理層亦預期今年有更多利好政策公布，包括低空領域開放，並受惠於國企改革政策，將可獲更多資產注入，而產品價格亦由現時的成本加成改為與市場掛鈎。

中航科工現價一四年市盈率32倍，今年預期盈利增長將維持一成多，一五年預測市盈率料降至28倍，估值絕不算便宜，但由於資產值因A股急升而受惠，加上注資憧憬升溫，可待回吐時吸納。