近呢幾個月發展商猛咁推售豪宅新盤，搶咗唔少市場購買力，加上二手業主見新盤啲價做得唔錯，所以無咩價講，令到交投靜番。地產代理老友話，九月份35個主要豪宅只係得85宗買賣，係近四個月最少，但係樓價就升咗0.9%。

二手業主叫價強硬，指標豪宅屋苑上月買賣為四個月最靜。（資料圖片）

灣仔會景閣上月無成交。

指標豪宅買賣及樓價走勢

利嘉閣張偉文同劉Sir講，九、十月份一手市場戰雲密布，多個貴價新盤密鑼緊鼓部署登場，凍結豪宅二手市場嘅購買力，指標豪宅屋苑成交滑落，上個月35個指標豪宅只係得85宗買賣，相比八月份有121宗，減咗接近30%，成交量更加係近四個月新低。

港島豪宅成交零星

如果以區域計，三區全線向下，港島區尤為顯著，區內16個物業成個月只係得27宗買賣，比八月份大減43%，除咗港島南貝沙灣同西區寶翠園有雙位數交投之外，其餘14個屋苑交投多數一宗起、兩宗止，而八月份有3宗成交嘅灣仔會景閣，去到九月份更加出現零成交。

佔中影響 價恐跌3%

張偉文仲話，九月份全港35個指標豪宅加權平均樓價指數報151.88點，按月升咗0.9%。

他續稱，由於最近出現「佔中」活動，政經形勢唔係咁明朗，相信豪宅今個月豪宅成交量有機會跌到得70宗甚至更低水平，估計樓價短暫會有下調壓力，預計調整空間介乎2至3%。

嚟番今個月，好多豪宅區到呢幾日交投先開齋，代理話，中半山啱啱錄到本月首宗成交，寶園有個中層C室，建築/實用面積約2,586/1,942方呎，以約4,750萬元易手，建築/實用呎價約1.84萬/2.45萬元。

跑馬地及大坑一帶今個月以千零萬元成交居多，利嘉閣李德臻話，名門5座中層B室同永富苑中層C室，分別以約1,920萬同1,800萬元賣出。

據了解，啱啱賣咗嗰個名門單位，實用面積約871方呎，實用呎價約2.07萬元。

中原余志偉表示，火炭駿景園今個月到依家錄到約3宗買賣成交，有換樓買家斥資1,038萬元買入8座低層H室，該單位實用面積1,039方呎，實用呎價約9,990元，而單位約五年間升值約60%。