國際貨幣基金組織（IMF）將環球經濟增長預測由3.2%降至2.8%，影響前晚華爾街三大指數回吐0.1至0.6%不等，IMF特別為環球樓市升浪提出警告，指出比利時、加拿大、澳洲及新西蘭等樓市已遠高於歷史平均水平，是未來經濟穩定的重大威脅。

新西蘭奶價近月累跌不少，但輝山業績所受影響暫時有限。（資料圖片）

太陽日誌 2014/6/13

綜合大行預測輝山業績（人民幣）

客觀現實，過去一年全世界除美國經濟有較明顯復甦外，歐洲及亞洲新興市場經濟均乍暖還寒，IMF統計指全球52個國家，過去一年樓價錄得升幅的有33個，意味三分二地方樓市有得升。

一句講晒，全球樓市泡沫，乃美國量寬水浸市場的後遺症，聯儲局主席耶倫眼見失業率已經達標，金融海嘯後流失的就業職位亦都通通番晒嚟，但對退市仍然擺出「拖得就拖」的姿態；近期歐央行驚見通縮徵兆，再推二輪量寬，接住印銀紙；日本開徵銷售稅後經濟復甦即刻見嘆慢板迹象，央行今日議息，擴大量寬都只係遲早問題。

樓市泡沫罪在央行

的而且確，以家庭收入同樓價比例計，全球樓市泡沫已經形成，仲愈吹愈大，不過咁樣係咪代表六個月、十二個月之後，樓價就要掉頭大插水？歸根究底，樓市泡沫的罪魁禍首是全球央行自己，齊齊量寬令銀紙愈嚟愈唔值錢，而樓價升勢幾時肯停，亦都要問番一眾央行，佢哋嘅貨幣戰爭幾時肯收手。

世界盃開波前夕，港股成交縮到唔夠500億元，恒指跌82點，收23,175點，恒指波幅指數再創今年新低，去到13水平，較意外係國指期貨炒到全日高位10,347點收市，計入除息因素，實際高水24點收。

收市後內地公布五月新增貸款8,708億元（人民幣．下同），比市場預期的7,500億元高一成六，亦較四月份的7,750億元多一成二，配合六月的定向降準，看來阿爺全力催谷第二季GDP，有機會由第一季的7.4%低位回升。

奶價下跌影響未見

輝山乳業（06863）派成績表，截至三月底止年度純利12.49億元，按年升32.1%，每股賺10分，末期息2.16分。

近期乳業股風雨飄搖，輝山的業績好到令人有啲意外，全年毛利率62.4%，高過上半年的58%。要知近排全球最大牛奶出口國新西蘭，當地奶價自二月拍賣見頂後，累積跌幅超過兩成，唔少人都擔心有沾手上游牧場生意的乳企好快會受牽連。雖則話輝山份業績得個多月時間反映乳價下跌情況，但睇佢去年產量50.17萬噸，升37.4%，營業額則升38.3%，似乎未受影響。

最近內地乳業龍頭之一的伊利，股價跌到七個一皮，尋日麥格理更將蒙牛（02319）評級降到跑輸大市，睇27.9元，比現價低兩成四，淡到暈。早排輝山因為基礎股東減持，隊到阿媽都唔認得，近期先穩定落嚟。無論信唔信份業績，或者怕唔怕嚟緊份中期走晒樣都好，尋日股價走勢卻係幾對辦，逼近好耐無見的50日線1.97元，看來仲可以博反彈升多浸，但講明係高風險。