Fundman睇市：細價股起動

中央召開十八大前夕，香港魚缸果然大玩「癲鬥傻」遊戲，升市由偏低的股份帶動，最緊要夠落後，無論航運、資源、煤炭定內銀股，基本因素短期無改善亦無問題，最緊要夠殘、累積沽空夠多、估值嚴重偏低。

上周五恒指主板成交由上周四創出個多月紀錄的709億元回落至563億元，沽空佔主板成交比例回落至7.4%，乃九月七日以來最低，諷刺是淡友開始轉軚，上周五美股卻在微軟及麥當勞等巨企季度業績欠佳下急挫超過200點，近期如取如攜的好友，今日多少要受到考驗。

近期港匯顯著轉強，金管局上星期主動買入美元，以免港元兌美元衝破7.75的強方兌換保證。熱錢湧港，魚缸自必得益。上周五美股低收，加埋聽日又係假期休市，話唔定今日初段恒指會先回回氣，但經驗告知，短線指數唞氣，資金多半會轉攻與指數冇大關係嘅二、三線股。好似上周開始見到一啲蟹貨甚多、股價低殘嘅細價股成功突圍而上，典型例子係國美電器（00493）及保利協鑫（03800），若然短線呢啲股份繼續向上，相信陸續有其他細價股靜極思動，搵啱對象食正頭啖湯都幾和味。中投三寶中，保利協鑫已起動，不妨睇實另外兩隻──中芯（00981）同旭光（00067）。

水泥業絕對是今浪浴火重生的鳳凰股，龍頭安徽海螺（00914）由八月底反彈42%，華潤水泥（01313）更升達54%，如把握到今次升浪，今年或者已經可以提早收爐。不過，由八月份水泥股的成交可見，試問有幾多人夠膽在八月水泥價格低點，賣一包蝕一包的情況之下，買水泥股咁有guts？

水泥股升浪擴散

事實上，內地九月份水泥價格的確有超過一成反彈，可是需求量增長唔算大。上半年內地水泥行業設備使用率只有65至70%，低於80%以上正常水平，水泥業經過今次小陽春後，明年情況能否改善，仍是有待觀察。

但講到明癲鬥傻，筆者只以兩至三個星期為目標，水泥股升浪由一線擴散到二線股的可能，仲係不可抹殺。海螺及潤泥市帳率分別回升至2.6及1.8倍，再數落去市值有番咁上下的，包括西部水泥（02233）及金隅（02009）的1.2倍，再冷門啲，有0.5倍的天瑞（01252）及台泥（01136），只能揀兩隻落注的話，「暫時」市值唔到10億美元的西泥及台泥，可以博股價再升之後，基金要焗跟。