股海實戰：中煤可望重拾升軌

十八大前維穩力量繼續發揮作用，加上人仔再現升值動力，熱錢湧港炒起中資股，解開了近期恒指踢穿21,000點仍未見有大幅回吐之謎。上周六金管局三年來首次出手干預港匯市場，相信短期尚會再度入市，而港匯走強將進一步加強資金進入魚缸短炒嘅信心，故有理由相信，至少喺十八大前，魚缸將保持大漲小回局面。

上周五美股低收，但相信下月大選前無大跌之虞。中資股中，煤炭股值得關注，事關若然真係好似領導人咁話，內地經濟繼續出現積極變化，嚟緊經濟活動有望持續轉趨活躍，最終必然會帶動煤炭需求回升，加上近日內地部門強調要實現今年淘汰625處小煤礦嘅目標，行業汰弱留強，大型煤炭股成受益者。

龍頭股神華（01088）上周成功突破250日線關，短線10日線有機會抽穿250日線，屆時走勢將有望進一步轉強。相對而言，中煤（01898）股價表現落後。睇番資料，九月份中煤嘅銷售量同比增長7.5%，首九個月銷量同比增幅則為4.7%，估計末季按月增幅會持續溫和回升，為股價帶來支持。另一可取之處，乃本月上旬母公司增持公司股權，並表明未來一年會按情況入場增持。過去兩個月，中煤股價底部支持上移，短線若能以大成交突破250日線8.25元，可確認重拾升軌，屆時季內目標可上調至五月高位9元水平，支持位可參考50日線7.1元。

新環保能源有睇頭

講完大價股，又睇隻細價股，經已轉型從事廢物處理設施相關業務嘅新環保能源（03989），八月初配股集資4,000多萬元後，最近又宣布以溢價配股集資8,000多萬元，作為一般營運資金。新環保前身係恒寶利，賣盤予北京首創後，近年着力打造內地固廢處理產業鏈。

目前除北京首創之外，彤叔旗下公司亦為新環保嘅主要股東，公司短時間內先後兩次配股，可視為密謀大翻身前嘅部署。現價公司市值才6億幾（已計及今次配股），有閒錢不妨先買首注坐定定，等交投轉活再加注，呢啲股仔一係唔行，一行三、五成屬等閒，不跌穿0.3元繼續持有。