樓市出更：無契樓玩晒拍賣場

本港樓價攀升，銀主盤源大減，一向有唔少呢類物業嘅私人拍賣行指出，目前市場上銀主盤源減到只有約30個，相比舊年過百宗嘅高位，勁減超過七成，過去半年以無契樓同涉額較細嘅車位同樓上舖物業成交最旺，其中無契樓賣咗至少11個，係近年最多。

忠誠拍賣行負責人鄭世傑同劉Sir講，拍賣場常見嘅銀主物業近呢一年愈來愈少，佢哋公司早前收集咗市場嘅銀主盤數據，發現依家成個市場嘅拍賣盤只得31個，對比舊年大減超過七成，相信同經濟好，同埋樓價飆升有關。

樓上舖車位成交倍增

劉Sir粗略估計，由四月至今，透過拍賣行賣出嘅無契樓至少有11個；而同期銀主盤嘅成交量只得大約5個，價錢亦普遍貼市價、甚至市價先賣到。鄭氏仲話，若然市況繼續好，物業斷供情況再減，銀主盤比例將會進一步減少。

不過，透過法院頒令拍賣一類物業有上升趨勢，包括有無契樓，同埋樓價較細嘅工商物業，好似向來有投資凶宅同無契樓嘅另類資深投資者陳應佳，四月初以142萬元買入屯門無契居屋兆禧苑單位後，最近一個月內兩度掃入同區新興工業大廈等2伙無契工廈單位收租，涉額共220萬元。

至於唔受額外印花稅影響嘅工商舖物業，交投同樣有增加趨勢，其中以細價車位同樓上舖嘅拍賣流通量較高，環亞拍賣行老友曾傑俊同劉Sir講，呢類物業嘅拍賣交投量，佔整體拍賣成交比例達20至30%，比早兩年多一倍。

本少利大短炒賺三成

呢類物業嘅摸貨亦明顯增加，好似長沙灣榮安大廈有樓上舖，面積約364方呎，獲投資者喺七月初以103.8萬元承接，迅速喺八月底以136萬元摸出，僅一個多月帳面就大賺超過三成，而呢個盤最近仲計劃以約140萬元透過拍賣放售。

雖然呢類物業成交多，但畢竟涉額較細，曾氏話，過千萬元嘅拍賣成交就絕無僅有，同早年每月都錄得呢類物業成交好唔同，慨嘆生意唔易做。