魚缸Blogger：數碼通坐定等收成
上周五iPhone5發售，一眾電訊股同相關概念股受捧，其中數碼通（00315）同瑞聲科技（02018）分別升2.2%及2.9%，前者係被蘋果欽點嘅本地電訊營運商，而後者就幫智能手機生產聲學零件，當日即市仲曾經挾到去28.4元，創上市新高。
去年賺成10億嘅數碼通，主打1,800Mhz的4G LTE頻譜，今鋪率先食住搶瘋潮。新iPhone有助刺激其4G上客量增長，配合相應綑綁式月費計劃，呢隻強勁現金牛可坐定定等收錢，長做長有。
即使撇開香港業務，數碼通都可以受惠明年起澳門實施全城3G，2G網絡將會停止服務，點都有啲睇頭。至於技術走勢，股價啱啱重返10日線15.3元，首站阻力不妨先睇16個半。
