用家趕入市 預約睇樓三連升

近期市場破頂成交頻現，不少用家抱着「早買早着數」心態趕入市，代理數據顯示，全港50個指標二手屋苑今、明兩日錄得共2,860組客戶預約睇樓，較上周同期再升2.7%，已是連續第三周報升，其中換樓客睇樓比例按周增近2.5個百分點至34%，創出近十四周新高。

利嘉閣研究部數據，按地區劃分，港島、九龍及新界三區指標屋苑周末預約睇樓量全面報升。

新界區增幅最勁

當中新界區升幅最顯著，按周增加3.1%，荃灣爵悅庭睇樓量按周升20%，該行朱世璋稱，自從荃灣西站灣畔項目高價標售後，不少業主加價、封盤，令盤源減少，惟用家依然勇於追價入市，故料本月下旬承接力仍然持續。

至於港島區屋苑預約睇樓量按周上升2.5%，指標藍籌屋苑太古城及康怡花園各升7%，而小西灣藍灣半島及鴨脷洲海怡半島更各升10%。該行吳國華稱，港島東區樓價急升，預期向隅客將流入海怡半島追落後。另九龍區屋苑預約睇樓量按周增2.4%，牛頭角淘大花園及紅磡黃埔花園按周各升11%。