樓市出更：內地家長買樓一石二鳥

內地人鍾意嚟香港買樓，可惜房地產已經剔出咗投資移民計劃範圍以外，不過劉Sir知道佢哋來港「買磚頭」意欲唔會就咁減少，美聯移民顧問啱啱搞咗個內地來港睇樓團，招待咗60名主要來自北京嘅內地客，反應都幾熱烈。

睇番近幾年多咗內地學生來港讀大學，明顯帶旺咗沙田、粉嶺等鄰近大學地區嘅租務市場，部分喺家長支持下索性喺同區買樓，一邊自用，一邊投資。

美聯移民顧問行政總裁吉安同劉Sir講，○三年推出投資移民計劃以來，獲批准移民來港申請超過1.4萬宗，涉及投資額逾千億元，雖然依家投資產品規定為金融資產，但經濟環境不穩下，其實呢班內地客仍然希望來港「買磚頭」，所以對本港樓市有殷切需求。

代理搞睇樓團反應熱

佢話最近就搞咗個睇樓團，針對一批有意申請投資移民嘅內地客，涉及約60人，主要嚟參觀黃大仙新盤現崇山，佢地對香港住宅嘅口碑仲唔錯添。佢仲話，平時都有帶開內地客「南下」睇樓，但通常都只係3至4人左右，不過今次反應咁好，所以陸續會安排內地客嚟港睇樓，令佢地多啲了解本港住宅市場。

據劉Sir了解，內地學生係香港樓市「生力軍」，早排同美聯吳梓鋒傾開，話呢年多咗內地客喺沙田市中心買樓，好多都係之前嚟香港讀大學、租開市中心屋苑嘅內地生，畢業後留港發展，見熟習環境，索性買間長住，之前就有個上海嚟嘅女大學生，中文大學畢業後喺香港搵到工，父母出錢買咗馬鐵車公廟站上蓋溱岸8號低層單位畀佢住，成交價約508萬元。

吳氏仲話，有一個租開偉華中心嘅內地學生，畢業後繼續留港，結果用咗約280萬元買偉華中心4座高層單位。

畢業後沽貨慳番SSD

而粉嶺近年都係內地學生租客搶租熱點，美聯黃嘉明話，早排有內地客，以前喺內地都有買開樓，依家個小朋友要嚟中文大學謮兩年書，想問吓香港嘅買樓手續，同埋要注意啲乜，最後用咗近230萬元買花都廣場面積約510方呎單位。

佢話個內地客覺畀仔女讀書用之餘，又可當投資，個仔讀完書啱啱夠兩年，賣番出去SSD都唔使畀，順手博樓價升值。