Fundman睇市：思捷不如搵超模打救

評級機構看來是唯恐天下不亂，西班牙銀行獲千億歐元援助，國王鬆一鬆飛去睇波，惠譽就一次過調低18間西班牙銀行評級，其十年期國債孳息一度見6.83厘歷史新高，與7厘爆煲觸發點只係一步之遙，有趣的是，前晚歐美股市對消息出奇冷靜，道指升162點，收報12,573點。

尋日港股牛牛皮皮，直到三點半後才發力，恒指升153點，報19,026點，主板成交持續偏低，只得465億，可見唔少未入市基金，都索性等埋周末希臘選舉消息至算。技術上，指數一旦升穿19,058點，一浪低於一浪的劣勢可望扭轉，等定唔等？對無貨者來說，筆者覺得最好以三分之一注碼先入市，免得一旦天下太平，升市唔等人。

思捷（00330）再有高管跳船，行政總裁范德施以私人理由請辭，股價停牌前急跌21%，報10.54元，而收市後，連主席Hans-Joachim Korber都宣布唔撈，由柯清輝接任，認真係七國咁亂。

講番范德施，佢為思捷打造四年重塑品牌路線圖，現行管理班子也大部分由佢聘任，樹倒猢猻散，今次最怕兩年半工作一鋪清，芬佬開始擔心業績V形反彈，可能係大家一廂情願。范德施最為人津津樂道（純個人感受），是請來超模Gisele Bundchen做品牌代言，Gisele早前被福布斯評為最有可能成為首位身家超越10億美元的超模，再睇思捷五年唔到，市值由高位蒸發九成一，計落Gisele有才力兼有財力，不妨諗諗入股做老闆，或者思捷有得救都唔定。

股神變明燈的四叔，近排發表「尾胡論」，建議投資者買股好過買樓，搞到身邊朋友牙痕痕話想跟四叔入市。筆者之前講過，買樓因為有按揭的槓桿效果，而買地產股要真金白銀百分百找數（孖展炒家除外），長遠而言，買樓仲係比買地產股較容易累積財富，甚至享受到資產增值。

地產股估值吸引

當然，對於經已擁有自住物業的股票投資者，刻下地產股的估值，的確頗吸引，以過去二十年為例，恒指地產分類指數，市帳率在九七年前夕及○七年，曾經試過突破兩倍的界線，在九八年、○三年沙士及○八年海嘯，曾經見過0.5至0.6倍水平，由此可見地產股盛衰周期，市帳率是介乎0.5至2倍之間。

近期香港樓價重返九七年高位，出奇是指數刻下市帳率連中位數1.25倍都未到，只有0.82倍，這很大程度反映金融市場對樓市後市的悲觀，以及憂慮特區政府換班之後，可能改變房屋政策，對樓市不利。惟目前形勢看來，新政府班子好大可能以「穩」為先，有大動作的可能性極微，七月一日前後，極度低殘的地產股會否有一次大型的修正，機會未可抹煞，筆者較鍾情近期新盤賣得唔錯的信置（00083），其股價似乎在六月上旬搵到支持，不妨留意。