股海實戰：國壽醜股大翻身

市況真係估佢唔到，周一歐美股市應升卻跌，周二應跌卻升，西班牙十年期國債孳息又「破頂」，但隔晚美股又可再升過，港股昨日早段逆外圍下跌，但其後炒阿爺「送禮」消息開始倒升，尾市再升一段，最後升154點，以接近全日最高位收市，穿埋萬九。

發改委官員證實有國家領導人會來香港賀CY上任，仲會帶埋「手信」，應該係同CEPA有關。不約而同，CY亦話可能同阿爺商討放寬自由行，如果冇希臘選舉單嘢從中作梗嘅話，港股六月下半月應該可以炒政策。至於希臘開大定開細暫時難估，但唔止歐元區輸唔起，希臘人更加輸唔起。

思捷（00330）周不時失驚無神嚇你一驚，一日之內CEO同主席先後跳船，要由柯清輝去收拾殘局，阿莊真係好唔明，點解隻股市值得百幾億仍可以留在恒指成分股？

太陽能股寒冬未過

內房股連升多日之後有回吐，最驚係趁高抽水。昨日輪到太陽能股及汽車代理股發威，兩類股都係跌到極殘之後終極反彈，太陽能股嘅寒冬定未過，保利協鑫（03800）母公司仲話要搞燃氣發電等其他電力業務分散風險，但保利協鑫肯定係惡劣環境當中唯一仍能賺錢之太陽能股，捱到出年至可能會有好日子過。

汽車代理股亦唔好過，一○年汽車優惠政策刺激銷量飆升，車廠於是搏命提高產能，呢兩年增長大幅放緩，形成汽車庫存急升，汽車代理公司受到好大壓力，要減價清存貨，4S店賣車已冇乜錢賺，要靠售後服務去幫補。內地企業之「政策依賴症」相當嚴重，家電股亦為其中一例。

昨日表現搶眼的仲有內險股，新華保險A股漲停板，國壽A股升7.2%，人保集團計劃下月來港招股上市，若成功集資234億元，將為本港IPO市場冲喜。內險股升得咁勁，主要係有報道話中保監有13項開放保險業新政出台，最重要一項係放寬保險資金投資基礎設施門檻，阿莊認為呢個可能性相當高，因為中央既要加快基建投資去刺激經濟，但同時最大問題係地方政府缺水，所以由「大把水」嘅險資負起投資任務會屬於「雙贏」。

人行減息對內險股其實利多於弊，因定期利率明降暗升，內險作為大客更加有價講，而向保險客戶提供之投資回報則因減息而降低。國壽（02628）呢個禮拜醜股大翻身，今年保費收入續跌已拋諸腦後，短線反彈目標20.5元。