SUN勢力：光大國際反彈未完
多得希臘位前總理多口評論脫歐準備，港股又再食彈散，恒指回落至18,786點，大市沽空比率更升至14.6%。睇怕一日未拆好希臘呢個炸彈，個市仲係易跌難升。
阿爺見外部因素差勁，惟有加大力度谷內需以穩增長，已宣布為數300多億元人仔嘅刺激節能消費品方案，一方面刺激內需，一方面推動節能環保，可謂一箭雙鵰！講開環保，從事多元化環保業務的光大國際（00257），上月受與前公司副主席相關的負面消息影響，股價受壓，但隨着有關人士辭任，不明朗因素消除，加上本月初落實投資浙江省垃圾焚燒發電項目，最近更獲基金入市增持，低位可以望多兩眼。
光國現價往績市盈率約十五倍，過去兩個財政年度純利均以雙位數字增長，預測估值顯吸引力。再睇近兩日該股人氣有改善，料反彈可持續，升穿50日線3.48元，可向3.75元推進。
