市場徐想：I.T 業務高速發展
大家成日行街，對唔同公司嘅生意狀況，理論上都好熟悉。I.T（00999）想當然大家都有聽過，冇聽過都有見過，皆因佢周街都係地舖！呢間公司近幾年品牌做得唔錯，每年盈利都有不俗增長。集團一直採用「多品牌、多層次」嘅營銷策略，用唔同嘅品牌組合，以及時尚設計師嘅魔力，打造一個潮流嘅形象。呢類型公司，食正潮流同風潮就飛得上天，仲可以令有眼光嘅股東都大賺一筆，都咪話唔和味。
今時今日，大家買件衫番嚟，當然就係買佢嘅設計啦，同一時間，集團除咗不斷實化品牌開發之外，亦積極打通中國市場嘅渠道。其實只要佢嘅品牌夠響，要開發內地同胞市場，絕對冇難度！
集團一○年度中國市場總收入上升32.9%，毛利增長33.5%，中國市場嘅收益同毛利一齊起飛！集團近幾年都維持高速增長，○七年至一一年盈利平均增長三成多，絕對夠支撐依家嘅十七倍多市盈率！
