股海實戰：中國鋁業走勢異動

受美股跌勢拖累，恒指尋日低開247點，全日低位22,156點，與三月份低位22,123點相距不遠，午後A股跌幅收窄，港股借勢反彈，只係動力有限，最終收報22,508點，升87點，算係單日轉向，但全日成交額僅604億元，論成交唔似係見底。

金魚缸淡風正盛，昨日大市沽空金額達62.9億元，沽空比率10.4%，另觀期指未平倉合約近10萬張，適逢本周五係美國「四權結算」，月底港股又係期指結算兼基金半年結，此前市況必再有大幅波動。

美債成不明朗因素

除此之外，如今全球投資市場另一重大隱憂，乃美債危機。事緣美國嘅債務已達到法定上限嘅14.29萬億美元，若然美國國會不批准提高舉債上限，八月美國政府將無法如期償付美債本金和利息，美國國債一旦「違約」，肯定會成為世紀金融大事。

現時唔少國家都揸住美債，中國就係美國最大嘅債主，難怪中國一聽到美國傳媒談及美債可能「技術性違約」，意圖測試債主容忍度，中國代表急忙警告「別玩火」。

事實上，信貸評級公司惠譽便警告，一旦美債違約，美國主權債務可能失去最高評級，後果難以想像。近日市場亦開始流傳，多家美國投行減少使用美債作為衍生工具等交易嘅擔保，改為增持現金應付，近期美股受壓，亦不排除同大戶套現需求有關。

平心而論，喺正常情況下，出現美債違約嘅可能性唔大，但美國今時唔同往日，特別係奧巴馬政府未能控制國會聲音，加上距離總統大選為期不遠，一旦共和黨玩嘢，真係咩事都有可能發生。

總括而言，呢個重大不明朗因素未獲解決，大家唔使太認真諗撈底，短炒亦宜嚴控注碼。

回說尋日市況，特區政府再出招為樓市降溫，地產股首當其衝，新世界（00017）及信置（00083）均創五十二周新低，恒地（00012）曾低見47.8元，但最終收報49.05元，升0.41%。由於樓市成交縮減，靠食佣嘅美聯（01200）認真濕滯，股價曾低見4.53元，收報4.66元，跌3.3%。

過去一個周末，阿莊同喺深圳開廠嘅友人聚首，席間呢位廠家不停訴苦，指生意一日比一日難做。阿莊問佢點解唔響應國策搬廠去大西北，佢話生產設施入晒地，一搬就要全數撇帳。聽落都替佢頭痛，亦令阿莊聯想起過氣藍籌富士康（02038），尋日該股再創五十二周低位3.51元，每次反彈都只係逃生機會！

再睇國企股，中國鋁業（02600）尋日開市見全日低位6.4元後回穩，午後喺其A股漲停下，一度高見6.73元，收報6.66元，升2.78%，成交2.16億元。其實上星期中鋁母公司整合稀土資源嘅消息，亦曾刺激中鋁股價顯著回升，成交放量，之後股價轉為反覆。

A股漲停似有動作

尋日A股又再異動，唔多尋常，係咪有大動作跟尾，就要等着瞧。展望下半年美元弱勢難改，商品股仍有其投資價值。睇中鋁短期走勢，上月底以來股價喺6.4至6.9元水平上落，RSI走勢現背馳，論交投近日「人氣」亦算合格，且看公司本身有冇消息跟尾，𥄫實交投小注怡情，向上主要阻力喺7元關，6.4元止蝕。

戰報

銀基集團（00886）

關焯照夠眼光，五月三十日睇中嘅銀基表現堅挺，昨高見7.69元，以推介日低位6.81元計，賺近13%。

國美電器（00493）

積奇於五月二十六日推介嘅國美，尋日最高升上3.05元，跟佢於當日低位2.8元上車，可賺近9%。