股海實戰：中國高精密有力破降軌

尋日上晝港股升得好哋哋，誰知下晝返來A股兩個樣，滬綜指低收作結，拖累港股回落，即使高山道地皮成交價超出市場預期，亦無助股市回升，結果恒指單日轉向，由最多升253點，至最後倒跌114點收市，收報23,892點，主板成交額回升至723億元。

滬綜指尋日午後跌勢頗急，且乃今年首次出現「四連陰」，市場消息甚多，有指發改委將針對樓市泡沫再出招，亦有指「五一」前後人行或再加息，甚而讓人民幣一次過升值，以應對通脹問題。

值得一提嘅係，尋日B股跌勢頗急，事緣市場盛傳上海推出國際板嘅準備工作接近全部到位，外企如大笨象（00005）、可口可樂，以及紅籌中移（00941）及中海油（00883），有望成為首批喺國際板掛牌嘅股份，意味着B股將近完成歷史任務云云。不過，國際板話推話推經已講咗好幾年，至今仍只聞樓梯響，係咪可以年內成事，阿莊有所保留。

回說香港市場，政府拍賣高山道地皮，得主係中小型地主，成交價達到15.25億元，高於市場預期。有業界計過，起好要賣成萬五蚊1呎，先至有兩成合理回報，可見地主們對後市前景十分之樂觀。歸根究柢，政府落手增加樓市供應，只係好聽，但實際上係「遠水難救近火」，而低息環境持續以及通脹預期，亦令樓價易升難跌。照咁睇，地主股估值仍有上調空間。

本地股份冇咩特別，反觀跌市之下中資股仍有亮點，建材股山水水泥（00691）、亞洲水泥（00743）及台泥（01136）股價均創五十二周高位，升幅介乎3.8至6.9%。不過，睇番龍頭股中建材（03323）股價創五十二周高位33.4元後掉頭回落，更倒跌2.9%收場，報31.7元，似乎預示呢轉升勢經已差唔多，故阿莊建議持貨者要把握食胡嘅機會，免得「貪」字得個「貧」！

工業自動化成趨勢

太陽能股係另一個逆市上升嘅板塊，保利協鑫（03800）再創五十二周高位5.19元，收報5.18元，升5.7%；陽光能源（00757）收報2.37元，升7.24%。擬分拆太陽能業務上市嘅信義玻璃（00868）最近有唔少投行發報告唱好，但股價似乎有點高處不勝寒，尋日收市跌1.39%，今日派息除淨，宜待回試8.8元水平承接，再謀定而後動。

另1隻可留意嘅中資股係中國高精密（00591），公司主要從事製銷高精密工業自動化儀錶及技術產品等業務，上月底以來股價反覆回揚，尋日股價逆市升逾3%，收報6.12元，成交增至3,354萬元。公司受惠中國工業自動化及部件國產化嘅大趨勢，現價一一年預測市盈率約十五倍左右，係1隻值得中長線睇好嘅內地工業股。至於股價走勢，若然短線能突破6.5元，可確認扭轉今年一月以來嘅下降軌，再向一月高位7.45元進發，10日線支持喺5.79元。

戰報

國際泰豐（00873）

姚午齊周二推介嘅國際泰豐逆市展強勢，推介日低位只係3.95元，尋日搶高至4.64元，兩日已賺逾17%。

旭光（00067）

錢進喺十四日吼中嘅旭光，尋日逆市再創新高4元，以推介日低位3.3元計，累積升幅超過21%。