股海實戰：統一醞釀突破要留意

港股連跌四個交易日，尋日終於見到技術性反彈。騰訊（00700）成表現最佳嘅藍籌股，高位曾見215元，收報214.6元，升7.09%，成交高達30億元，話唔定來自傳聞中嘅場外期權交易沽盤經已告一段落。

聯通（00762）反彈勢強亦值得一提，事緣公司上月經營數據理想，大行唱好，股價迅即收復前日失地，收報15.32元，升5.95%。事實上，３隻龍頭電訊股之中，中移（00941）冇波幅可炒，而中電信（00728）受開售iPhone之期遲遲未有落實而股價受壓，故見大戶繼續留守聯通，料季內股價有機會挑戰16至17元水平。

農行反彈勢頭強勁

恒地（00012）派發末期息每股0.7元，今日除淨，阿莊持兩萬股收息1.4萬元。另外，持倉中嘅農行（01288）尋日反彈勢頭強勁，最高見4.7元，收報4.68元，升4%，成交7.5億元，低吸機會一瞬即逝，持貨信心增強，且等長假後公布嘅經營表現以定去留。

再生能源板塊消息不絕，太陽能股卡姆丹克（00712）首季多賺3.11倍至8,351萬元人民幣，股價急升9.3%。食住個大好形勢，公司最近宣布擬透過發行可換股債券及認股權證集資7億多元，睇勢股價仲有排升。

反觀專做風電機組嘅金風科技（02208）就唔同命運，剛宣布首季盈利同比倒退16.99%，股價急插11%。投行高盛踩多腳，剛發表報告下調內地風電行業一一至一三年度每股盈利預測及目標價，其中金風評級由「中性」調低至「沽售」。咁嘅環境，恐怕金風股價尚要探底，未到撈貨時候。

講完新興產業，又講吓傳統食品股統一（00220），事關見到尋日該股有１手904萬股嘅交叉盤上板，作價每股4.3元，最終收報4.4元，升0.07元。睇番幅公仔圖，股價自月初由4元邊升上4.4元後便轉向橫行，似正醞釀突破，加上有大手上板，不妨多望兩眼。

涉足民生消費產業

本月初統一宣布悉數購入卡帝樂實業權益，總代價6.3億元人民幣。據講卡帝樂實業主要銷售一般商品及家庭電器、物業管理、會議服務及租賃自置物業，過去兩年每年純利500多萬元人民幣。今次統一嘅收購，除咗係涉足非食品業務外，仲間接收購卡帝樂嘅自置物業，據講該物業價值估計高於6.3億元人民幣。

查實去年五月統一曾發通告，指擬成立股權投資企業及投資管理公司，藉以參股喺內地民生消費相關產業等領域，今次收購項目，可視為落實這個發展方向。目前內地方便麵及糕點等市場已發展至數大業者之爭，難有大突破，公司透過投資其他領域以實現喺內地市場嘅戰略擴張，有助更好地利用主營業務嘅網絡及經營現金流的優勢，提升公司價值，未嘗唔係一條好嘅出路！

戰報

維奧集團（01164）志強上周五睇中嘅維奧，果然有料到，尋日搶高至0.96元，跟佢於推介日低位0.8元上車，又賺兩成。

興達國際（01899）Sammi尋日推介隻興達即日落鑊，一度高見9.8元，吼中於低位8.74元上車，即日鮮都賺逾12%。