大款不滿限購想移民
內地富人投資興趣「大挪移」，根據一項調查顯示，內地個人可投資資產達到1,000萬元（人民幣．下同）以上嘅有錢人，喺限購、限貸令之下，對投資內地嘅房產興趣大跌。富人為咗仔女着想同埋保障財富，有60%想投資移民。
招商銀行尋日同貝恩顧問發布咗《2011中國私人財富報告》，對象係擁有1,000萬人仔做投資嘅群體。
九成唔再買樓
去年全國由個人持有、可用嚟投資資產嘅錢高達62萬億元，呢班富人有成50萬人，料今年會再多9萬人。
富人前年投資喺房地產嘅資產配置有17.6%，中央打壓樓市炒風，呢個比例就縮水到今年初嘅13.7%。90%人話唔會再買，有一半就話會逐步撤回房產嘅錢。
向境外投資移民嘅人數亦大為急升，在過去五年，內地投資移民去美國嘅複合增長率高達73%。
