太子手記：李禮輝講減薪氣定神閒
中行（03988）舊年盈利首次突破千億元（人民幣．下同）大關，不過管理層人工大縮水。相比好多歐美銀行大班，太子真係戥內銀大班唔抵，如果EQ唔夠，真係好容易「心理不平衡」。
行長李禮輝氣定神閒咁話，國有控股嘅金融企業高管薪酬有規限，舊年開會時，已經有人問佢，業績愈來愈好，但高管薪酬就愈來愈少，究竟會唔會因為咁而「心理不平衡」。
國家信任 當好行長
李行長就不慍不火咁話，佢今年「心理很平衡」，與財政部比較，工作要比佢自己更加辛苦，但係報酬比起佢依家嘅水平低好多。佢仲話，唔理薪酬係點樣，作為中行高管其中一名成員，就係社會、國家寄予佢哋信任，一定會好好履行職責「當好行長」。
翻查中行年報，無論行長定係董事長，人工都大縮水超過三成七。李行長薪酬跌至92.3萬元，董事長肖鋼縮至100.8萬元。
