太子手記：李家傑助貧童出錢出力
為善最樂。剛剛於去年七月做老竇、「一索三男B」嘅恒地（00012）副主席李家傑深明此道，對內地貧苦兒童特別關愛。去年八月華夏基金會舉辦嘅慈善晚會，獲得李家傑慷慨解囊，捐贈咗1,000萬元。
親身到內地探訪
華夏基金會為表示謝意，專登喺今晚舉行捐贈儀式，並且會詳細公布有關捐款的用途。李家傑同華夏基金會嘅關係非常密切，佢係基金會嘅名譽委員兼信託委員會委員。
太子知道，舊年四月就曾經藉個人名義成立嘅「李家傑珍惜生命基金」，聯同華夏慈善基金，喺內地西北地區開展「愛佑童心」計劃，為寧夏、陝西、甘肅多個省份嘅先天性心臟病兒童提供免費手術治療。李家傑唔單止捐錢，仲親身到上述地區做探訪，可謂身體力行嘞。
