太子手記：金石慶幸上市有驚無險
呢排外圍市場人心惶惶，新股隻隻都好似危危乎，金石礦業（01380）尋日首日掛牌即跌穿招股價，但董事長兼首席執行官陳濤仍然一臉紅光滿場飛，完全唔在乎弱市同自己嘅股價。
陳濤同太子講，今次金石上市過程有驚無險，目前市況欠佳，上到市已經好好，佢話先係招股期間發生利比亞局勢混亂，都驚影響招股反應，睇到同期嘅幾隻新股要押後，金石掛到牌集到資，股價跌少少都唔在意，因為公司可以專注自身業務發展。
送雲石雕寓意虎虎生威
金石係做雲石礦開採，陳濤送畀港交所嘅上市禮物，就係一隻精美嘅雲石老虎，係佢特登搵師傅雕o架，祝願港交所同大市可以虎虎生威喎。同埋，金石今次攞個靚冧巴1380，都例牌送咗100萬元畀公益金，做吓善事。
佢話日本大地震對金石無乜影響，反而未來日本重建，或會增加入口中國嘅雲石料做裝修，對公司生意都有幫助喎。
