期指攻略：50日線成好淡關鍵
港股周三偷步炒內地二月通脹數據回落，到尋日中港兩地股市反而「行路打倒褪」，大孖沙顯然唔想數據前賭咁大，積極減磅鎖定利潤，恒指全日浸浸落，跌195點，報23,614點。西班牙主權債務評級又被調低的消息，令期指收市前曾跌穿23,520點的午後低位，相信多少預示今日亞洲股市會繼續受消息影響，有調整壓力。
昨日期指開23,797點，乃全日高位所在，期指早市在23,630點附近雖見支持，惟在基金買貨興趣缺乏下，期指即市呈一浪低於一浪，直到收市前去到23,513點才停步，比較奇怪反而是最後三十分鐘，期指轉炒高水，由23,513點挾到23,640點收市，未知是否連淡友都唔想坐貨過市？
反彈告終言之尚早
今日焦點係市場對歐債危機的反應，以及內地通脹數據，假如二月CPI在4.4%或樓下，相信對中港股市都有一定鼓舞作用。昨日一跌，還未能說反彈告一段落，好友可視50日線的支持定去留，現貨及期指分別是23,502及23,446點，手上好倉會繼續以23,440點作為止賺位，一旦失守，後市有機會先回試23,135點。
