Fundman睇市：新意網另類收息之選

政府要令市民討厭好容易，加徵重稅就搞掂，同樣地，討好市民都唔難，人人都喜歡派錢，唔信？澳門就年年用呢招平息民怨，諗極都唔明，點解鬍鬚曾死都唔肯學還富於民。

尋日焦點，自然係特區政府財政預算案，筆者Facebook上的朋友，一窩蜂狂鬧財爺份預算案，食煙嘅有食煙鬧，鍾意玩車嘅媽媽聲，鍾意「投資」物業嘅同樣話鬍鬚曾一面講大市場小政府，一面又伸出無形之手「搞搞震」，似乎成份財政預算一無是處，只係頭痛醫頭、腳痛醫腳的短視措施。

筆者最不滿，仲係香港面對進口通脹，百物騰貴，普羅市民落茶餐廳食個早餐，都由十幾蚊有交易，變成今日無廿幾蚊都落唔到樓。

要知市民薪酬趨勢，呢幾年就好似入咗雪櫃急凍一樣，升幅遠遠跑輸通脹，如果政府用700億盈餘搞活經濟，無可厚非，派錢都無問題，至少可一解燃眉之急，但偏偏鬍鬚曾就係要將錢入落個有得睇無得使嘅強積金戶口。

香港「強輸金」收費高，表現差劣，若不是要做守法公民，筆者肯定早就cut咗呢個三年輸四成、投資表現仲差過銀行大堂篤機黨的「強輸金」戶口，轉買盈富基金（02800）好過。

利比亞局勢未有平息迹象，這非洲第三大產油國立立亂，刺激紐約期油繼續向金融海嘯後高位進發，執筆時見96美元。美股前晚插178點，雖然港股周二已偷步跌咗近500點，但尋日埋單仲要跌83點收市，報22,906點，反彈乏力，成交縮到655億元，睇形勢至少要等周五期指結算，淡友贏夠之後，大市先至有機會反彈。

去年股市搵銀唔易，加埋零息與高通脹，要為手上鈔票保值難上加難，君可見去年初至今，高息及收租股的表現跑贏大市一截，連久久唔發市的希慎（00014），年多時間都有五成七升幅。

筆者想起一隻冷門收租股—新意網（08008），十年前，打着科網先鋒旗幟，但其實集團主要收入來自數據中心租賃，同收租股的業務模式相近。新意網嘅一大優勢，不單是手頭有11.6億元現金（每股0.49元），還有保持五年以上的核心溢利增長紀錄。

業務模式似收租股

截至去年十二月底止的上半年業績，純利倒退26%至1.29億元，然而，撇除前年出售物業（柯達大廈二期兩層樓面）的一次性收益4,000萬元，稅前溢利實際有一成五增長，至1.51億元。

期內，數據中心及物業投資佔3.01億元收入的85%，前者中期收入升17%，恐怕比不少甲級商廈還要理想，以25.8億元資產淨值計算，半年資產淨值回報率為5%，即使租值無增長，全年至少也達10%，假如公司考慮派走現金，股本回報相信會更加高。

過去三年，新意網盈利派息比率介乎39至66%，取中間落墨，並估計全年盈利在2.8億至3億元左右，預計股息回報率將介乎6.4至6.8厘，同市面上幾隻REITs比較，有過之而無不及，如果想搵追到租金及通脹的定息回報，新意網是冷門得嚟幾吸引的選擇。