瑞年國際（02010）由上市到依家都係筆者嘅至愛，其市場佔有率逾22%，相對次位對手的市場份額得5%，更凸顯出佢嘅王者風範。除主打嘅營養保健品、保健飲品業務外，瑞年亦積極發展藥品業務，雖然藥品分部先剛剛開波，但係透過收購南京瑞年全部股權，令佢得到生產一種抗癌藥同埋兩種眼藥所需嘅許可證、藥品嘅國家食品藥品監督管理局批文同藥品GMP認證等等相關嘅監管批文。由於發展上述藥品嘅入場門檻同生產技術都比較高，符合一般企業策略上所講嘅獨特性，令到瑞年嘅競爭優勢有所提升。
瑞年計劃於二○一○年底之前將佢哋嘅分銷門市擴大到50,000間以上，再將佢哋用喺內地長三角其他省份嘅高滲透率分銷模式，嚟發展擁有強勁消費能力嘅華南同華中省份，喺分銷戰略嚟睇梗係好嘢啦！筆者亦都睇好佢業務往後發展嘅持續性，相信佢仍然有唔小上升空間。