陳凱琳 劉佩玥添食擔大旗

無綫劇《四個女仔三個BAR》大結局收視理想，最高收視達32點，是近年少數破30點大關的劇集，更將劇中「四個女仔」推上「女神枱」！同劇演員黃智賢、陳凱琳（Grace）、劉佩玥（Moon）、陳瀅（Jeannie）和監製陳維冠等昨日收到消息後，異口同聲表示有意食飯慶功，更想食住個勢開續集，當中Grace期望原班人馬拍續集：「希望四個女仔喺續集會有多啲戲份，觀眾都好鍾意我哋嘅感情！」黃智賢亦樂見收視破頂：「收視咁好，證明咗台前幕後嘅努力，不過未落實幾時慶祝，都係今日（昨日）先知，唔知公司有咩表示呢？」他又自言喜歡角色范智毅，期望再次有團隊合作。

日日慶功食到病

「四個女仔」在鏡頭後以姊妹相稱，絕無是非，若續集要勾心鬥角爭上位，Moon亦不擔心會有摩擦：「黐埋一齊就會嘻嘻哈哈，反而係驚演技未夠出色！」談到相約慶祝，她透露昨日因感冒菌入腸胃嘔足6次，最近未必可以：「但我哋四個女仔日日都出嚟慶祝，尋日仲去野餐添！」Jeannie對續集亦充滿期望：「其餘三個都想拍前傳扮學生妹，講點樣辛苦讀書考入Law School。（互換角色？）我想做何雁詩個角色！佢個角色好放、好好笑，又想佢扮我個角色有公主病，一定好正！」

監製讚演技自然

監製陳維冠明言若開拍續集絕不能缺少靈魂人物、編審李茜：「佢真係好有經驗，但佢係Freelance性質幫手，希望續集佢可以坐鎮。依家都係初步構思緊，等公司安排。」他又大讚陳凱琳和劉佩玥表現出色：「雖然佢哋冇咩經驗，但演得好自然，所以下集會集中喺佢哋身上，希望佢哋有更好發揮！」另外，無綫劇《倩女喜相逢》上周六大結局最高錄得24點收視，成績不俗。