趙碩之明剃黃竣鋒眼眉

前亞生黃竣鋒（前名黃集鋒）去年被拖糧，戶口一度只剩下$7.9，約滿亞視後加盟拾星堂的他成為趙碩之（Wylie）師弟，期望新一年行大運的他，日前邀得Wylie出手剃鬚及剪髮。貪玩的Wylie拎起剃刀向黃竣鋒粗眉進攻，嚇得他眼凸凸兼大叫，其後Wylie豪邁地為他剷青，立即被黃竣鋒的髮型師喝停，最終她只好乖乖地以鉸剪理髮，黃竣鋒才放鬆心情整古做怪，合十兼舉手投降。有理髮榮譽證書的Wylie自言首次為男生剪髮，又指平日會用鉗為男友拔鬚。他倆希望新一年在影壇作新嘗試，期待合作拍動作片，黃竣鋒說：「依家練緊西洋拳、唱歌，充緊電，只係等緊一個機會，有機會就會爆炸！」Wylie則寄望私生活與工作平衡，珍惜與親友及男友相處的時間，並不急於結婚：「唔結婚同結婚都係一齊過，只要互相推動、成長就OK，但都有可能閃婚！」