女子組合HunterZ成員蕊蕊、陶枳樽（Crz）、何麗娟（Kelly）及鄧詠雪（Suetzi）早前試玩「哈囉喂」小兒科鬼屋，細膽的蕊蕊嚇到花容失色兼於鏡頭「消失」，相當搞笑！

蕊蕊（左）嚇到躲在Kelly身後，陰功豬咯！

Kelly（右起）、Crz、Suetzi及蕊蕊原本合體走入鬼屋。

但蕊蕊遇「龍爪」（紅圈示）突襲即唔見咗人！

Crz（左起）、蕊蕊、Kelly及Suetzi勇闖鬼屋探險。

Suetzi一見多啦A夢即興奮Chok甫。

由蕊蕊領軍的女子組合HunterZ日前提早到主題公園感受「哈囉喂」氣氛，獲安排試玩「星魅製片廠」，她們甫入「鬼屋」即疑神疑鬼，眾人在工作人員帶領下四圍拍照，最細膽的蕊蕊驚驚青青，Crz、Kelly及Suetzi則不顧形象大擺甫士影相。

遇恐龍突襲

她們最後在一間房內跳舞，期間遭恐龍突襲，房內的窗及傢俬均被破壞，嚇得蕊蕊尖叫狂奔，走出鏡頭，場面搞笑！她們笑言擔心有失儀態而拒跟心儀對象去鬼屋，蕊蕊透露曾嚇到扯爛朋友衣服，更失控打到鬼怪退後走：「每次啲朋友都畀我抓到損晒、瘀晒。（同男友金剛去過鬼屋？）未，但佢好鍾意睇鬼片，成日都畀我嚇親，因為我好小嘢都嗌，佢都驚咗我。」

多啦A夢氹番

自認細膽的Crz表示不敢玩鬼屋：「試過有男仔件衫本來細碼，出到嚟畀我扯到變中碼。其實我最怕生物，玩蟲一定唔得，假嘅都接受到。」Kelly最驚聽鬼古，認為會吸引「嗰啲嘢」過來，Suetzi則笑說：「試過有男仔想扮英雄，但其實佢勁細膽，本身想保護女仔，點知自己嚇親！」

化身美少女戰士

HunterZ當日又到訪「多啦A夢哈囉喂派對」，看到可愛的多啦A夢裝飾及擺設後，嚇到花容失色的蕊蕊即重展歡顏。問到萬聖節會去哪裏狂歡？蕊蕊笑言偕金剛扮美女與野獸；曾與好友扮五星戰隊的Crz笑說：「我哋全部蒙晒面去蘭桂坊搞事，我就扮粉紅色着裙仔嗰個，今年HunterZ會扮美少女戰士。」