「魔鬼胸」蔚雨芯（Rainky）早前遠赴南極及阿根廷，全程被同行的外國探險隊如「蟻摟蜜糖」般包圍，並施展不同冧招，不過Rainky直言無意發展異地戀。

蔚雨芯親親Cute爆企鵝，勁興奮！

蔚雨芯在冰天雪地下剝剩比堅尼，凍到入心！

多名外籍探險人員冧蔚雨芯冧到出面，更熱情搭膊！

女歌手蔚雨芯早前與廖啟智及師兄狄易達等遠赴南極及阿根廷拍攝旅遊特輯，十多日冰天雪地歷奇之旅，對20歲的Rainky來說可謂畢生難忘，除了能近距離觀察企鵝、鯨魚及海豹，Rainky又冒寒游冬泳，玩得興起更在冰雪上起舞及拉筋，完全無懼氣溫只得零下十幾度。

探險船陽盛陰衰，絕大部分探險人員都是壯男，Rainky年輕貌美自然吸引全場注目，全程獲VIP式招呼。Rainky笑言當達仔及經理人文滌在場時，眾外國猛男變得黑口黑面，但只得Rainky一人時，他們即笑晒口圍實她傾偈，又猛讚她身材似Barbie，相當搞笑！

遇o靚仔剝衫

另一批探險人員則不時戲弄Rainky，希望令她留下印象，Rainky說：「有次坐衝鋒艇睇鯨魚，我烏身想拎起啲浮冰，隔籬個男仔推我一下，嚇到爭啲跌落水！」更有餐廳侍應主動問Rainky是否有男友，又不停出動甜品攻勢。

對於收納大批觀音兵，Rainky笑言享受：「佢哋都好好人，有啲仲幾靚仔，交換咗E-mail，但異地戀真係唔得，太遠喇！搭飛機要三十幾個鐘，過海三十分鐘都嫌耐啦！」此外，Rainky在南極雪地上穿比堅尼拍照晒身材，引來同行的旅客有樣學樣：「有三個男仔學我除衫，除剩孖煙囪咋！」